Týskvøldið 31. okt. kl. 19 verður verkætlanin um staðarnøvn í Nes kommunu løgd fram á almennum fundi í miðhøllini í Tofta skúla. Samstundis verður talgilda kortið við staðarnøvnunum lagt á alnetið.
Súni í Hjøllum, borgarstjóri, bjóðar vælkomin.
Janus Jensen, Ólavur Magnussen o.o. fara at greiða frá verkætlanini.
Menninir í Undirhúsinum syngja, og ein drekkamuður verður eisini at fáa.
Hjartaliga vælkomin!
Nes kommuna.
Seinnapartin varð arbeiðstakarasáttmáli undirskrivaður millum Nes kommunu og JSJ, sum skal innrætta eitt høli í Mathiasa pakkhúsi til alment wc.
Tað var annars fyrr í heyst, at býráðið avjørdi at taka av tilboðnum frá JSJ.
Súni í Hjøllum, borgarstjórin, undirskrivaði fyri kommununa, meðan Jóhan Smith Jensen undirskrivaði fyri JSJ.
Eftir ætlan verður arbeiðið liðugt um mánaðarskiftið januar/februar í komandi ári.
Fuglark gjørdi útbjóðingartilfarið og fer eisini at hava eftirlit við arbeiðinum fyri Nes kommunu.
Blómuhúsið hjá Haraldi S. Hammer lat upp nýggjan handil á Toftum í dag. Handilin hevur leigað seg inn í “Sannusa handil” á Toftavegi 10 á Toftum.
Tað er ikki á hvørjum degi, at ein handil letur upp á Toftum. Tá ið dyrnar lótu upp í dag, vóru nógv fólk møtt. Blíðskapurin var stórur við vaflum, ísi og kaffi.
Súni í Hjøllum, borgarstjóri, nýtti høvi at vitja og ynskja Haraldi S. Hammer tillukku og Blómuhúsinum vælkomnum.
Á myndini eru frá vinstru: Súni í Hjøllum, borgarstjóri, Sally Davidsen, starvsfólk, Maud Hansen, starvsfólk, Haraldur S. Hammer, eigari og Jastrid Olsen, sum var tann fyrsti kundin í dag.
Nes kommuna ynskir Blómuhúsinum allar bestu eydnu.
Í fjør gjørdu Nes kommuna og Bústaðir rammuavtalu um eitt grundøki oman fyri kommunuskrivstovuna. Avtalað varð, at Nes kommuna gjørdi grundøkið byggibúgvið og síðan seldi tað til Bústaðir, sum síðan skuldi byggja íbúðir, sum Almannaverkið síðan fer at leiga til íbúgvar, sum eru fevndir av teirra tænastum.
Fyrr í summar varð sáttmáli undirskrivaður millum Bústaðir og Byggivirkið KBH um bygging av íbúðarbygningi í trimum hæddum við 18 íbúðum, staðsettur á Kneysum á Toftum.
Íbúðirnar verða uml. 50 fermetur. Afturat íbúðunum verða felagshølir, starvsfólkarúm, goymsla, tøknirúm vm.
Aftanfyri bygningin verður gjørt eitt elevatortorn, trappur, svalagongd og stuðlamúrur við hegni. Frammanfyri bygningin verður altan, terrassa og parkering.
Nú er KBH av álvara farið undir byggingina, sum eftir ætlan verður liðug á sumri 2025.
Vitjað varð í tveimum dagstovnum, útibarnagarðinum Fjallafípuni og barnagarðinum Baldursbrá, sum er úti á Norðoyri.
Nes kommuna fer í næstum at umrøða, hvussu ein møgulig útbygging á dagstovnaøkinum skal fara fram. Endamálið við vitjanini var tí at kunna seg um, hvussu Klaksvíkar kommuna skipaði sína seinastu útbygging á dagstovnaøkinum.
Eyðstein Poulsen, formaður í Trivnaðarnevndini børn og ung, greiddi frá saman við dagstovnaleiðslunum og umboðum fyri umsitingina í Klaksvíkar kommunu.
Nes kommuna vil fegin takka fyri góða móttøku og áhugaverda framløgu.
Seinastu árini eru fleiri umvælingar og dagføringar gjørdar í Tofta skúla. Eitt nú eru dagføringar gjørdar í svimjihøllini, 1958-bygningurin er klæddur og nýggj tónleikahøli eru gjørd.
Í summar bað kommunan um tilboð frá fleiri veitarum at endurnýggja og umbyggja hølini til alis- og evnafrøði.
Býráðið í Nes kommunu hevur samtykt at taka av tilboðnum frá byggifyritøkuni KBH. Arbeiðið byrjar í næstum.
Í morgun varð arbeiðstakarasáttmáli undirskrivaður. Fyri Nes kommunu undirskrivaði Súni í Hjøllum, borgarstjóri, meðan Helgi Johannesen, stjóri, undirskrivaði vegna KBH.
Teknistovan í Gøtu hevur projekterað og fer at hava eftirlitið vegna Nes kommunu.
Í vár vitjaðu umboð fyri Avannaata kommunu úr Grønlandi nakrar kommunur í Føroyum. Tey vildu kunna seg um skipanir innan kommunala geiran her á landi. Tey vitjaðu eisini í Nes kommunu, har borgarstjórin hevði eina framløgu um kommununa, meðan starvsfólk svaraðu spurningum.
Í summar kom so bræv frá Palle Jeramiassen, borgarstjóra í Avannaata kommunu, har hann takkar fyri gestablídni og framløguna hjá Nes kommunu. Borgarstjórin sigur seg vera hugtiknan av mátanum, ið Nes kommuna loysir sínar avbjóðingar. Í brævinum kom samstundis ein áheitan og innbjóðing, har hann ynskir at gjalda fyri at fáa umboð fyri Nes kommunu at koma til Ilulissat at greiða politikarum og starvsfólkum teirra nærri frá umsiting, fyrisitingin og rakstri av Nes kommunu.
Við hesum átaki vildi borgarstjórin í Avannaata kommunu geva sínum starvsfólkum íblástur at broyta mannagongdir og skipanir til tess at minka um rakstrarútreiðslurnar í teirra kommunu.
Í seinastu viku vóru Súni í Hjøllum, borgarstjóri, Elsbet E Magnussen, kommunuskrivari og Anfinn í Toft, tekniskur leiðari, og løgdu fram fyri politikarum og starvsfólkunum í býráðshølunum í Ilulissat (Jakobshavn), har Avannaata kommuna hevur sítt høvuðsæti.
Í Avannaata kommunu, eisini nevnd Nord kommune, eru 4 býir og 21 bygdir. Íalt búgva áleið 11.000 fólk í kommununi. Størsti býurin er Ilulissat. Har búgva áleið 5000 fólk. Hinir býirnir eru Uummannaq, Upernavik og Qaanaaq.
Kommunan strekkir seg yvir ein tein á 1300 km, og tað starvast 1700 fólk hjá kommununi. Borgarstjórin í Avannaata kommunu gjørdi greitt, at tað er alneyðugt hjá teimum at minka um rakstrarútreiðslurnar.
Nærri kunning um Avannaata kommunu kann lesast á www.avannaata.gl
Niðanfyri eru nakrar myndir, sum tiknar eru á ferðini hjá Nes kommunu í Ilulissat.
Týsmorgunin 12. september kl. 9 verður farið undir at asfaltera á Regnavegnum.
Tit verða vinarliga biðin um at flyta bilarnar, meðan arbeitt verður.
Nes kommuna
Í ár eru gjørd fleiri viðlíkahaldsarbeiði eins og nýgerðir í Nes kommunu. Komandi vikurnar verða eisini onnur arbeiði gjørd, eitt nú asfaltering av Regnavegnum og asfaltering av almennum p-øki við Høganesvegin.
Á fyrstu myndini, sum er tikin í morgun 1. september, síggja vit teir í tekniska toyminum arbeiða uppá ein vegabrunn á Gaddavegnum.
Innari partur av Heygsvegi er gjørdur liðugur. Hesum arbeiði hevur Falkon staðið fyri.
P-økið við skúlan er dagført av Falkon og asfalterað av EM-asfalt.
Á Kvíggjarvegi er farið undir at gera fortorv. Hesum arbeiði stendur EJ-maskinur fyri.
Trappan av Kneysum og oman í Oyrarnar er dagførd av KBH
Á Neshamri verður brimskaðin umvældur av JSJ
Dekkið á Saltneskajuni er umvælt. Skákið hevur staðið fyri arbeiðinum.
Grótverjan i Oyrunum er komin út á 100 m.
