FRÍTÍÐARKORTIÐ

Hvat er Frítíðarkortið?

Í sambandi við viðgerð av fíggjarætlanini fyri 2020 varð samtykt at seta í verk eitt frítíðarkort, við endamálinum at stuðla børnum og ungum fíggjarliga at verða virkin í frítíðarvirksemi.

Talan er um eina royndarskipan fyri 2020, sum verður eftirmett tá árið er úti.

Øll børn og ung í aldrinum 6 til 18 ár fáa eitt frítíðarkort til eitt virði á kr. 2.000, sum kann nýtast til lima- og luttøkugjald í ymisku ítróttar- og frítíðarvirksemistilboðunum, sum teimum standa í boðið í Nes kommunu og aðrastaðni. Tvs at Frítíðarkortið er galdandi fyri tey, sum fylla 6 ár í 2020 til og við tey, sum sum fylla 18 ár í 2020. Frítíðarkortið kann nýtast til: ítrótt, skótar, kvøldskúla, musikkskúla v.m.

Hvussu virkar Frítíðarkortið?

Nes kommuna skrásetir øll børn og ung 6 til 18 ár í kommununi at eiga kr. 2.000 tilgóðar at nýta til lima- og luttøkugjald í 2020.

Har feløg/felagsskapir í Nes kommunu skipa fyri almennum tilmeldingardegi, er møguleiki at fáa skrásett seg á eitt yvirlit, og Nes kommuna flytir peningin beinleiðis til feløgini/felagsskapirnar samsvarandi yvirlitinum. Gjaldsváttan verður tá send til foreldrini.

Mannagongdin annars í samband við nýtslu er, at børn og ung gjalda fyrst til feløgini/felagsskapirnar og fáa so endurrindað frá Nes kommunu við at senda kvittan til kort@nes.fo, har tað framgongur, hvat fyri barn og hvat fyri frítíðartilboð goldið er fyri.

Nes kommuna treytar sær, at har Frítíðarkortið verður nýtt, skal felagið, sum stendur fyri virkseminum hava:

  • Viðtøkur og nevnd
  • Venjarar/lærarar sum eru yvir 18 ár – yngri kunnu vera hjálparvenjarar
  • Virksemi, sum fevnir yvir minst 10 samanhangandi vikur

 

Um tit hava spurningar viðv. Frítíðarkortinum, eru tit vælkomin at venda tykkum til Nes kommunu við telduposti á kort@nes.fo ella á telefon 447586.