Útsetti aðalfundur Bátafelagsins verður í felagshølunum á Toftagjógv.
Hósdagin 18. november kl. 19
Skrá smb lógum felagsins.
Uppskot til aðalfundin skula vera nevndini i hendi 8 dagar undan fundinum,
fyri at koma til viðgerðar.
Uppskot vera at senda til : hogniwaag@gmail.com
Nýggjir limir eru vælkomnir at tekna seg.
Atkvøðurætt hevur limur, ið rindað hevur limagjald.
Toftir 2. november 2021
Nevndin fyri Bátafelagið á Toftum
Høgni Waag Høgnesen, form.
”Gamla B68” húsið, sum nú er tann gamli parturin av barnagarðinum á Svangaskarði, er í ár dagførdur uttan. Bygningurin er bjálvaður og hevur fingið nýggja klæðing, so nú líkist hann meira tí nýggjara partinum av dagstovninum.
Tá ið dagstovnurin varð útbygdur fyri nøkrum árum síðan, varð “Gamla B68 húsið” samanbygt við nýggja partin.
Eftir dagføringina, sum er gjørd í ár, kann sigast, at hesir báðir bygningar meira síggja út sum ein heild.
Í komandi ári er ætlanin at mála bygningarnar. Eisini er ætlanin at bøta um og dagføra útiøkið hjá barnagarðinum eins og hjá vøggustovuni.
Tað er Byggivirkið KBH, sum hevur staðið fyri at gera arbeiðið, meðan Teknistovan í Gøtu hevur tikið sær av tí tekniska partinum. Teknistovan hevur eisini staðið fyri eftirlitinum fyri Nes kommunu.
Nes Kommuna takkar KBH og Teknistovuni í Gøtu fyri gott samstarv.
Minningarhald teirra sjólátnu verður í Fríðrikskirkjuni mánadagin 1. november kl. 15
Eftir taluna verður farið niðan til minnisvarðan, har kransar verða lagdir.
Kirkjuráðsvalið verður í kjallaranum í Fríðrikskirkjuni týsdagin 2. november kl. 10-20.
Tey, sum ikki eru heima valdagin, kunnu atkvøða við brævi á kommunuskrivstovuni í seinasta lagi mánadagin 1. november kl. 12
Borgarar, sum av einhvørji gyldugari orsøk ynskja at velja heima, kunnu venda sær til kommunuskrivstovuna á tlf. 447586 í seinast lagi mánadagin 1. nov. kl. 12
Um miðjan apríl varð sáttmáli undirskrivaður millum Nes kommunu og JHR-enterprenørar at gera veg til níggju grundøki á Ólavsvegi, sum er framhald av Gaddavegnum
Arbeiðið uppá at gera vegin varð boðið út til seks arbeiðstakarar. JHR átti lægsta tilboðið.
Nes kommuna ber sjálv kostnaðin av at leggja ávísar leiðingar.
Tað er Teknistovan í Gøtu v/Henning Olsen og Jens Kl. Jacobsen, sum tekur sær av teknisku vegleiðingi og eftirlitinum fyri Nes kommunu.
Arbeiðið at gera vegin gongur eftir ætlan. Vegurin verður væntandi liðugur fyri árslok.
Í vár bjóðaði Nes kommuna alment út eitt øki áleið 2000 fermetrar við Høganesvegin til bygging eftir ávísum ynskjum og treytum. Av trimum áhugaðum fyritøkum varð fyritøkan KBH vald.
Sum uppfylging uppá uppskot um byggiverkætlan við Høganesvegin, hevur KBH arbeitt víðari við verkætlanini og kannað øll tey uppskotini/hugskotini, sum vóru uppi og vendu á fundinum við umboð fyri kommununa beint fyri summarfrítíðina.
Út frá øllum hesum uppskotum, hugskotum og ynskjum, fóru teir aftur til tekniborðið. Teir halda seg nú hava funnið ta loysnina, sum teimum dámar best. Haraftuat metir KBH, at teir við hesi verkætlan nøkta ein eftirspurdan tørv á marknaðinum, sum eisini hóskar væl við atliti til umhvørvi og grannalag á staðnum.
Uppskotið, sum teir hava projekterað liðugt, er væl í tráð við upprunauppskotið í teirra umsókn. KBH hevur tó gjørt tvær ymiskar innrættingar – ávikavist við 3 ella 4 kømrum. KBH heldur seg hava eina spennandi byggiverkætlan.
KBH hevur fyri stuttum fingið graviloyvi frá Nes kommunu. Á bygdaráðsfundinum mánakvøldið 25. okt. samtykti bygdaráðið at geva byggiloyvi til umrøddu randarhúsini.
Randarhúsini eru staðsett í vøkrum náttúruumhvørvi og góðum útsýni yvir Skálafjørðin. Randarhúsini verða partur av nýggja býlinginum í økinum , har Nes kommuna hevur longt Høganesvegin og gjørt klár til nýtt setahúsaøki í niðaru síðu av vegnum, meðan ætlanin er at hava randarhús, íbúðir o. l. í ovaru síðuni.
KBH fer í hesi verkætlanini at byggja tvær ymiskar húsatypir í tveimum hæddum. Hvørt randarhús hevur yvirdekkað bilskýli, tøknirúm, goysmlsu, inngongd/dur, 2 wc, bryggers, stórt rúm til køk/stovu og ávikavist 3 ella 4 kømur.
Haraftuat er ein stór altan/terassa og gott tún bæði í niðaru og ovaru síðu.
Útgrevstur og planering verður væntandi liðugt til jóla. Byggingin av teimum seks randarhúsunum byrjar eftir ætlan í januar 2022.
Hesi mál vera fyri á bygdaráðsfundinum 25.10.2021 kl. 18:00
Mál nr. Málsheiti Málslýsing
132/2021 Fíggjarmál Fíggjarætlan 2022- Skálafjarðar Sløkkilið
133/2021 Fíggjarmál Fíggjarætlan 2022 – Roðin
134/2021 Fíggjarmál Eykajáttan Roðin íløga
135/2021 Tekniskt mál Uppskot um broyting í reglugerð
136/2021 Tekniskt mál Umsókn um byggiloyvi til randarhús
137/2021 Tekniskt mál Umsókn um byggiloyvi
138/2021 Tekniskt mál Gelendari við Heygsveg
139/2021 Mentanarmál Afturlatið mál
140/2021 Burðardygd Upplatingartíðir á endurnýtsluvirkinum
141/2021 Fíggjarmál Fíggjarætlan 2022 – Nes kommuna 2.viðgerð
NES KOMMUNA
Altjóða læraradagurin, 5. oktober, er ein heilt serligur dagur í skúlanum. Endamálið við honum er at virðismeta og menna heimins undirvísarar. Fleiri enn 100 lond hátíðarhalda dagin, sum varð hildin fyrstu ferð í 1994. Tá spratt dagurin úr heimsyvirlýsing Sameindu Tjóða frá 1948 um mannarættindi. Eitt punkt er, at øll hava rætt til skúlagongd. Rætturin til góða og mennandi skúlagongd kann ikki gerast veruleiki uttan dugnaligar lærarar og starvsfólk annars.
Næmingaráðið og skúlastýrið skipa fyri degnum í Tofta skúla.
Í morgun bjóðaði Durita Jakobsen, skúlastjóri, vælkomin. So var morgunsangur á skránni. Eftir morgunsangin helt ein næmingur í næmingaráðnum eina sera væl skrivaða røðu. Síðan fekk Alis Jacobsen, fyrrv. lærari, orðið. Hon segði frá síni skúlagongd á Toftum. Hon segði frá bæði stuttligum og hugnaligum minnum frá sínum barndómi. Ásannast má, at nógv er broytt.
Vegna skúlastýrið bar Kristian Poulsen fram eina heilsan.
Tá ið røðurnar vóru lidnar, var gávuhandan á skránni. Lærararnir sótu niðri, meðan flokkarnir skiftust um at koma niðan og handa gávur, sum næmingarnir og foreldraumboðini í flokkunum høvdu skipað fyri.
At enda takkaði skúlastjórin fyri tiltakið.
Nes kommuna vil hervið takka skúlastýrinum, næmingaráðnum og foreldrum fyri væl fyriskipað tiltak.
Tofta skúla ynskir Nes kommuna at veita eina stóra tøkk fyri fyri gott samstarv við ynskjum um framhaldandi blíðan byr.
