Heimasíðan hjá Kommunufelagnum skrivar soleiðis tann 26.01.24:

Fyri fyrstu ferð í søgu felagsins fingu allar kommunur í dag formliga sess kring borðið í Kommunufelagnum. Á skrá vóru alt frá aktuellum lógaruppskotum til framtíðar talgildar raðfestingar og gransking í kommunala geiranum.

Fyri jól samtykti ein eykaaðalfundur hjá Kommunufelagnum at tryggja øllum kommunum rætt at luttaka á stýrisfundum felagsins. Í dag var so fyrsti stýrisfundur í felagnum har allir 29 borgarstjórar høvdu møguleika at møta og geva sína hugsan til kennar um tey mál, sum felagið arbeiðir við.

Á skránni í dag vóru umrøða av einari røð av lógaruppskotum – harav fleiri kunnu hava heilt munandi ávirkan á kommunala geiran.

– Kommunala røddin er púra avgerandi fyri at landið kann skipa skynsamar karmar kring tey mál, sum vit umsita vegna borgarar okkara. Eg ivist ikki í, at tann røddin fer at ljóma enn klárari nú vit hava fingið allar borgarstjórarnar til borðs, sigur Tórbjørn Jacobsen, formaður í Kommunufelagnum.

Á fundin vórðu eisini umboð fyri Talgildu Føroyar, ið greiddu frá nýggjum og komandi hentleikum á Vanganum og í Samleikanum, og sum meira verður at frætta um so hvørt loysnirnar verða klárar. Felags málið er, at tað skal vera gjørligt hjá borgarum at avgreiða flest øll viðurskifti síni við kommununa talgilt, trygt og høgligt.

Eisini greiddu umboð fyri Setrið frá møguleikunum í at nýta nýggju granskingarsamstarvsavtaluna millum Setrið og Kommunufelagið. Og ítøkiliga varð greitt frá komandi granskingarætlanum, sum kommunurnar fáa høvi at hava aktivan leiklut í.

Sum áður fráboðað, so er svimjihylurin stongdur vegna umbygging í skúlanum.

Arbeiðið er meira umfatandi enn væntað, og tí fara helst at ganga nakrar vikur afturat, áðrenn tað er klárt at svimja aftur.

Vit koma við nærri kunning um miðjan februar.

NES KOMMUNA

Nú vit eru farin um ársskiftið og inn í eitt nýtt ár, er hóskandi at meta um farna árið og gera ein samandrátt av, hvørjar ætlanir liggja fyri framman.

Tað er við takksemi, at vit kunnu staðfesta, at fyri Nes kommunu hevur árið sum heild verið sera gott. Tað hevur verið stórur fólkavøkstur og inntøkuvøkstur.

Í februar kundu vit hátíðarhalda, at fólkatalið var farið upp um 1500, og kommunan tók við býarheitinum. Um árskiftið 2023/2024 búðu 1535 fólk í Nes kommunu. 17 børn vórðu fødd í 2023.

Í fíggjarætlanini fyri 2023 varð roknað vit einum persónsskatti á 58,6 mió., meðan úrslitið gjørdist 65,3 mió.

Í 2023 eru fleiri farin í nýggj sethús og íbúðir. Tað hevur verið og er stórt virksemi við bygging av íbúðum og sethúsum í kommununi. Í 2024 fer virksemið at halda fram. Kommunan væntar at gera avtalur um sølu av enn meira lendi til bygging.

Við tí inntøkuvøkstri, sum hevur verið, so hevur kommunan eisini havt møguleika at gera íløgur, fremja ábøtur og hava viðlíkahald á ymsum økjum. Framburðurin í kommununi er stórur á flest øllum økjum.

Tá ið sitandi býráð tók við, varð samtykt at seta eina høvuðsyvirskift, sum ljóðaði: ”Trivnaður, framburður og burðardygg menning við skilagóðari fíggjarstýring.” Nú farið er inn í seinasta árið í hesum valskeiðnum, kann sigast, at væl er komið burturúr, og at endamálið í stóran mun hevur eydnast; eisini við skilagóðari fíggjarstýring. Nettoskuldin er um árskiftið umleið 41 prosent.

Kommunan hevur raðfest skúlan, svimjihøllina, musikkskúlan, dagstovnarnar, ítróttarøkið, vegakervið, endurnýtsluvirkið, útstykkingar og atløgubryggjurnar á Neshamri og í Saltnesi.

Vatnreinisverkið er uppstigað við eini stórari íløgu í ár, og um stutta tíð verður nýggja reiniskipanin sett til.

Farið er undir at gera brimverju í Oyrunum, so økið við tíðini kann útbyggjast til eitt trivnaðar- og miðstaðarøki. -Ein spennandi tíð stendur fyri framman í hesum sambandi.

Størsti parturin av tilfarinum til brimverjuna í Oyrunum er higartil komin úr bakkanum norðan fyri saltsøluna. Við hesum er vinnuøkið har eisini munandi víðkað.

Vísandi til fíggjarætlanina fyri 2024 fara vit eisini at síggja stórar útbyggingar á fleiri økjum í ár.

At nevna:

Høganesvegurin verður longdur við 170 m. Soleiðis verða skaptir møguleikar til framhaldandi sethúsa- og íbúðarbygging.

Í vár verður hildið fram at leingja brimverjuna í Oyrunum. Í løtuni er komið út á 110 m, meðan ætlanin er at koma út á 180 m til heystar. Í ár er eisini peningur avsettur til at fyrireika, skipa og byrja verkætlanina við trivnaðarøkinum við Rætt.

Móti sumri fær Frítíðarskúlin eina stovu afturat, og útiøkið verður gjørt liðugt.

Í vár verður hildið fram at gera útiøkið í barnagarðinum betri. Somuleiðis verður ferð sett á at fyrireika eina útbygging av Barnagarðinum.

Í skúlanum verður farið undir 1. byggistig av at gera útøkið betri. Alis-/evnafrøðistovan verður gjørd liðug, og takið á 1981-bygninginum verður skift.

Í Ítróttarhúsinum á Svangaskarði verður hildið fram við umvælingunum, eitt nú við at skifta vindeygu. Arbeitt verður í løtuni við fyrireikingunum av at gera eitt áskoðaraskýli, sum eftir ætlan skal gerast í 2024.

Kirkjugarðurin verður víðkaður við 1400 fermetrum. Fyri at fáa til vega tilfar verða í hesum sambandi onnur arbeiði gjørd. Lýðarsvegur verður longdur, Regnavegurin verður breiðkaður og p-øki verður eisini gjørt í Gerðinum.

Gongugøta verður gjørd úti á Nesi, frá reinsiverkinum og út á Líðarenda.

Í Fíggjarætlanini hjá Nes kommunu fyri 2024 er eisini avsettur peningur til størri og smærri verkætlanir. Eitt nú er peningur avsettur til gongubreyt á Kvíggjarvegi. Eisini verða størri og smærri asfaltarbeiði raðfest.

—

Samanumtikið kunnu vit siga, at 2023 royndist væl, og fyri framman stendur enn eitt spennandi ár.

Áralagið í býráðnum hevur verið gott, og tað er ein fyritreyt fyri at náa góðum úrslitum. Starvsfólkunum í kommununi bera vit eina hjartans tøkk fyri gott arbeiði og gevandi samstarv. Eisini vil býráðið bera øllum teimum eldsálum, yngri sum eldri, hvør á sínum øki, sum dag og dagliga gera eitt so fyrimyndarliga gott og mennandi arbeiði í lokalu felagskapunum, eina hjartans tøkk fyri at stuðla undir trivnaðin í Nes kommunu, okkara felagsskapi.

Við hesi stuttu kunning vilja vit at enda ynskja øllum okkara borgarum eitt gott og vælsignað nýggjár!

Fyri Nes kommunu

Súni í Hjøllum, borgarstjóri

Sum áður fráboðað, so er svimjihylurin stongdur vegna umbygging í skúlanum.

Væntandi verður hylurin opin aftur umleið 5. feburar. Nærri kunning kemur tá.

NES KOMMUNA

Nes-, Sjóvar- og Runavíkar kommuna umsita í felag barnaverndina í økinum við Skálafjørðin. Nú húsast barnaverndin í húsunum, sum Símun í Bakkanum og konan Karla í sínari tíð bygdu úti við Toftavatn. Roðin, sum er eldrasamtakið hjá somu kommunum, eigur húsini.

Í morgun var lítil móttøka á skrivstovuni í Nes kommunu fyri Elsibeth Johannessen, sum byrjaði í skrivstovustarvi hjá kommununi í dag.

Seint á heysti í 2023 varð lýst eftir skrivstovufólki til umsitingina hjá Nes kommunu. Inn komu 19 umsóknir.

Á býráðsfundi tann 27. nov. 2023 varð samtykt, eftir tilmæli frá setanarbólkinum, at seta Elsibeth Johannessen, Nes, í starvið.

Elsibeth hevur skrivstovuútbúgving og drúgvar arbeiðsroyndir bæði á privata og almenna arbeiðsmarknaðinum. Seinastu 15 árini hevur hon starvast á skrivstovuni hjá Taks í Klaksvík.

Í morgun nýtti Súni í Hjøllum, borgarstjóri, høvi, vegna býráðið og umsitingina í Nes kommunu, at bjóða Elsibeth Johannessen vælkomnari og ynskja henni allar bestu eydnu í nýggja starvinum.

Umsókn um loyvi at brenna nýggjársbál skal stílast til Skálafjarðar kommunala Sløkkilið tlf. 448235 ella sks@sks.fo í seinasta lagi 31/12 kl. 12.00

Kommunuskrivstovan er stongd frá 23. desember 2023 til og við 1. januar 2024. Opið er sum vant aftur 2. januar 2024.

Átroðkandi boð kunnu avgreiðast á vakttelefonini 448144, sum svarar alt døgnið.

Loyvi til nýggjársbál:

Umsókn um loyvi at brenna nýggjársbál skal stílast til Skálafjarðar kommunala Sløkkilið tlf. 448235 ella sks@sks.fo í seinasta lagi 31/12 kl. 12.00.

Í gjár varð arbeiðstakarasáttmáli undirskrivaður millum Nes kommunu og KBH, sum skal innrætta eina stovu afturat í nýggja Frítíðarskúlanum á Svangaskarði.

Nýggi Frítíðarskúlin, sum varð tikin í nýtslu á sumri í 2022, hevur havt eina óinrættaða stovu standandi tøka, sum æltanin hevur verið at innrætta, tá ið brúk varð fyri hesum.  Komandi summar verður tørvur at hava eina stovu afturat, og tað var í hesum sambandi, at býráðið á fundi 27. nov. 2023 samtykti at fremja hesa ætlan.

Byggiarbeiðið varð boðið út, meðan HVS og EL arbeiðstøkurnar blivu bodnar til somu fyritøkur, ið frammanundan hava gjørt hesi arbeiði í bygninginum, ávikavist Blikksmiðjan og HD elektric.

Fuglark projekteraði og hevur eisini eftirlitið við arbeiðnum, sum verður liðugt fyri summarfrítíðina komandi summar.

Á myndini: Helgi Johannesen, stjóri í KBH, og Súni í Hjøllum, borgartsjóri í Nes kommunu.

Nes kommuna og Falkon skrivaðu í gjár undir sínámillum avtalu um víðkan av kirkjugarðinum á Nesi.

Arbeiðið byrjar fyrst í komandi ári, og tá verður kirkjugarðurin víðkaður við umleið 1400 fermetrum. Seinasta útbyggingin av kirkjugarðinum var liðug í 2001, men nú er neyðugt at taka stig til enn eina víðkan.

Í avtaluni við Falkon er eisini ásett, at fyritøkan tekur sær av at gera eitt p-øki í Gerðinum, leingja Lýðarsveg til tess at fáa trý nýggj grundøki í ovaru síðu og harafturat breiðka ein part av Regnavegnum. Hetta er ein stórur fyrimunur, tí so kann nakað av tilfarinum frá hesum arbeiðum brúkast til víðkanina av kirkjugarðinum.

Á myndini eru frá vinstru: Súni í Hjøllum, borgarstjóri, Jóhan Berg, stjóri og Petur Jákup (Dakko) Petersen, formaður í Teknisku nevnd.