Tolin trívst, sigur orðatakið. Í dag er hol endiliga sett á arbeiðið við at
grava út fyri nýggja íbúðarøkinum á Kneysum á Toftum.
Tilgongdin hevur verið sera drúgv. Í 2013 byrjaði samskiftið við Bústaðir um
ætlanirnar at byggja íbúðir í Nes kommunu, og í oktober 2018 undirskrivaðu Nes
kommuna og Bústaðir undir rammuavtalu um bygging av 2 íbúðareindum, við íalt 18
íbúðum. Tað er Falkon Entreprenørar, sum stendur fyri lendisarbeiðnum fyri Nes
kommunu og Bústaðir og Byggivirkið KBH hava undirskrivað partalagsavtalu um
byggingina.
Íbúðirnar verða bygdar á Kneysum, beint omanfyri havnarlagið á Toftum.
Staðsetingin er góð, stuttur vegur er í skúla og gott útsýni er yvir fjørðin.
Bygd verða tvey íbúðarhús. Tað eina við átta eins íbúðum á umleið 75
fermetrar og hitt við 10 íbúðum, har tær seks eru umleið 50 fermetrar hvør og
hinar fýra eru umleið 75 fermetrar hvør. Allar íbúðirnar hava úthús, dur,
baðirúm og køk/stovu. Tær minnu íbúðirnar hava eitt sovikamar, meðan tær størru
hava tvey kømur. Allar íbúðirnar hava egna inngongd og terassu ella altan. Góð
parkeringsøkir verða gjørd við bygningarnar.
Eftir ætlan verður tann sunnari bygningurin, sum hevur átta eins íbúðir,
skipaður sum lutaíbúðir. Skipanin við lutaíbúðum er rættuliga óroynd í einum
føroyskum høpið, og ynskir Bústaðir á henda hátt at vera við til at fjøltátta
útboðið av íbúðum. Nágreinilig lýsing av viðurskiftunum um lutaíbúðirnar, kemur
seinni.
Eftir ætlan verður klárt at flyta inn í fyrstu íbúðirnar á heystið 2020.
Í hesum døgum verður gjørt klárt at fríðka Sámalsgil á Toftum. Tað er økið millum sunnasta partin av Høganesvegnum og landsvegin. Tað hevur leingið verið ætlanin hjá kommununi at fríðka hetta økið, og í løtuni verða drenrør og onnur rør løgd, áðrenn mold verður planerað á økið. Útgrevstur fyri íbúðarøkinum á Kneysum byrjar fyrsta dagin, og skal partur av moldini nýtast til útfylling í Sámalsgil.
Seinastu tíðina er stórt arbeiði lagt í at hampa og dagføra
økið vestanfyri bátahylin á Toftum. Tað eru Falkon og EM Asfalt, sum hava gjørt
arbeiðið saman við teknisku deild hjá Nes kommunu.
Falkon hevur javnað og planerað part av økinum, umframt at hava
gjørt ábøtur á verjugrótið. EM Asfalt hevur asfalterað økið, sum er nakað
omanfyri 3.000 fermetrar til støddar.
Tíðliga á heysti 2018 bleiv økið millum virkisbygningarnar hjá Faroe Orgin, á leið 1.000 fermetrar, eisini asfalterað.
Á myndini frá vinstru: Tríggir dreingir og ein mammureyv (nr. 3), Heavyweight (Nr. 1) og FC Toftir (nr. 2).
Á vinnandi liðnum vóru Hjalmar Dalbú, Niklas Joensen, Jóhan Petur Poulsen og Jonleif Højgaard. Hetta er sjeyndu ferð at skipað er fyri Nes kommunu cup, og triðju ferð at Jóhan Petur er á vinnandi liðnum, og er hann mest vinnandi einstaki leikarin í søguni hjá Nes kommunu cup.
Nes kommunu cup er væl umtókt. Kappingin var fullteknað og væl av áskoðarum leitaðu sær í Tofta skúla 29 desember fyri at fylgja við í kappingini.
IRF boðar frá, at broytingar eru í innsavningini av ruskposunum hesa vikuna.
Í Nes kommunu verða posarnir tiknir í dag.
Nes kommuna ynskir øllum sínum borgum eitt gott og eydnuberandi nýggjár, við tøkk fyri tað farna.
Nógv fýrverk er skotið av seinastu dagarnar og hevur tað sjálvandi havt nakað av óruddi við sær, sum nú liggur og rekst millum húsini. Nes kommuna heitir vinarliga á allar borgarar um at taka skotið fýrverk upp.
Nýggjárshaldið, sum eftir ætlan skuldi verða í kvøld kl. 23.15, er útsett vegna veður.
Frá B68 verður boða frá, at um viðrar, verður nýggjarshaldið í annaðkvøld, 1. jan. 2019 kl. 20.00, á sama stað og við somu skrá.
Aftur í ár skipar B68 fyri nýggjárshaldi á Toftum. Nýggjárshaldið verður í ár norðan fyri bilverkstaðið við Rætt. Nýggjársbálið og fýrverkið verður norðanfyri Saltsøluna.
Skráin:
kl. 23.15 B68 bjóðar heitt kakao og bollar við bilverkstaðið við Rætt – norðureftir.
kl. 23.30 Nýggjársrøða, sum Alfred Olsen heldur.
kl. 23.45 Verður tjóðsangurin sungin.
kl. 24.00 Verður nýggjá árið skotið inn við fýrverki og bálið tendrað.
Møguleiki er at leiga fimleikarhøllina í Tofta skúla í jólafrítíðini. Í tíðarskeiðnum frá 22/12-18 til 1/1-19, umsitur Jaspur Højgaard høllina. Jaspur er at hitta á telefon nr. 243085.
Nes kommuna ynskir øllum eini gleðilig jól og eitt av Harranum signað nýggjár, við tøkk fyri tað farna.
