Leygardagin tendraðu jólatrøini Nes kommunu. Við jólatræshaldið á Toftum helt Krista Magnussen talu, Nes sóknar Hornorkestur spældi, jólamenn vitjaðu og børnini fingu pakkar.
Aftaná bjóðaði kommunan øllum kakao og bollar í Nebo, har tað eisini bleiv skipað fyri felagssangi og barnakórið í Nebo sang.
Olivia Tausen læs jólaevangeliið.
Mánadagin, 2. des. kemur nýtt línuskip til landið.
Talan er um línuskipið Atlantic úr Ålesund, sum P/F Eysturoy á Toftum hevur keypt.
Línuskipið Atlantic er bygt í 1998 og er eitt væl útgjørt frystilínuskip, sum er 44.9 metrar langt, 10,5 metrar breitt og lastar 320 tons. Høvuðsmotorurin og ljósmotorarnir eru Caterpillar og vórðu settir í skipið í mai 2018. Frystiútgerðin er frá 2012. Skipið kann frysta umleið 24 tons um samdøgrið. Skipið kann bæði frysta heilan fisk og skera fiskin til flak. Við skipinum verða 16 mans við.
Síðsta túrin Atlantic var til fiskiskap undir norskum flaggi, royndu teir í russiskum sjógvi. Teir landaðu 320 tons av frystum fiski hósdagin í Ålesund. Tá liðugt var at landa, varð ymiskt viðlíkahald gjørt umborð og leygardagin setti skipið so kós móti Føroyum.
Skipið verður væntandi á Toftum mánadagin 2. des kl 13:00, har móttøka verður fyri nýggja skipinum.
Atlantic kemur inn í flotan í staðin fyri Sigmund.
Í sept. 2019 hevði Julianna Nesá verið í starvi hjá Nes kommunu í 25 ár. Julianna var dagrøktarmamma frá 1994 til 2016, í heili 22 ár. Julianna hevur arbeitt í vøggustovuni síðani hon lat upp í 2016.
Í gjárkvøldið vóru starvsfólkini hjá Nes kommunu til árliga jólaborðhaldið, og tá bleiv Julianna Nesá heiðrað fyri hennara 25 ár í starvi hjá Nes kommunu.
Jóhannus Danielsen, borgarstjóri, takkaði Julionnu fyri trúgva og góða tænastu og handaði henni gávu og blómur. Gávan var ein málningur, sum Jón Magnus Joensen hevur málað.
Jólamennirnir koma við sløkkiliðsbili, og børnini fáa pakka.
Tá jólatræshaldið er liðugt, bjóðar Nes kommuna øllum til kakao og bollar í Nebo. Tá øll hava fingið kakao og bollar, verður felagssangur í salinum í Nebo, har nøkur jólaløg verður sungin. Eisini luttekur barnakórið í Nebo og jólaevangeliið verður lisið.
HÁTÍÐARDAGUR Í FRÍÐRIKSKIRKJUNI 1. SUNNUDAG Í ADVENT.
Tað var 1. s. í advent í 1994 at Hans Jacob Joensen biskupur vígdi Fríðrikskirkjuna. Hetta hátíðarheldur kirkjuliðið komandi sunnudag.
Sunnudagin, 1. des., kl. 11.00 verður hátíðargudstænasta. Martin R. Jacobsen, Jónsvein Bech og Ovi Brim luttaka. Kirkjukórið syngur.
Aftaná gudstænasta eru øll boðin til døgurða í kirkjukjallaranum.
Kl. 18.00 verður sangløta í Fríðrikskirkjuni. Kirkjukórið, VOX, The Gadders, Taborkórið og Martin og Tóri R. Jacobsen luttaka. Aftaná eru øll vælkomin til drekkamunn í kirkjukjallaranum.
Nes prestagjald bjóðar øllum at verða vælkomnum.
Skattalistin fyri 2018 liggur frammi á kommunuskrivstovuni í døgunum frá 28. november til 14. desember 2019.
Eisini samtykta fíggjarætlanin fyri 2020 liggur frammi í sama tíðarskeiði.
Á bygdaráðsfundi hjá Nes kommunu í gjárkvøldið bleiv samtykt, at bygdaráðsfundirnir í 2020 eru hesar dagar:
Mánadagin 27. januar Mánadagin 29. juni
Mánadagin 24. februar Mánadagin 31. august
Mánadagin 30. mars Mánadagin 28. september
Mánadagin 27. apríl Mánadagin 26. oktober
Mánadagin 25. mai Mánadagin 30. november
Fundirnir eru kl. 18.00 í fundarhølinum hjá Nes kommunu.
Mál, sum skulu verða viðgjørd á bygdaráðsfundi,
skulu verða kommununi í hendi 14 dagar áðrenn fundin.
Kunngerð.
Hesi mál vera fyri á bygdaráðsfundinum 25.11.2019 kl. 18.00.
Mál nr. Málsheiti Málslýsing
107/2019 Fíggjarmál Fíggjarætlan 2020 – 3. viðgerð
108/2019 Fíggjarmál Uppíbygging av egningaskúri – 2. viðgerð
109/2019 Fíggjarmál Nevndarvikur og bygdaráðsfundir 2020
110/2019 Fíggjarmál Reguleringar til fíggjarætlanina 2019
111/2019 Tekniskt mál Umsókn um byggiloyvi til sethús
112/2019 Tekniskt mál Umsókn um byggiloyvi til trafohús
NES KOMMUNA
Nes kommuna og Falkon hava undirskrivað avtalu um kavagrevsturin í kommununi.
Fyri at kunnu átaka sær uppgávuna, viðv. kavagrevstrinum í kommununi, hevur Falkon keypt nýggja gravimaskinu, sum er komin til Føroyar í hesi vikuni. Talan er um eina gravimaskinu av merkinum CAT 908M.
Eyðfinn Johannesen, sum í nógv ár hevur havt kavagrevsturin um hendi, hevur í ár selt maskinuna, sum hann brúkti til kavagrevsturin.
Nes kommuna takkar Eyðfinni Johannesen fyri trúgva og góða tænastu, og ynskir Falkon til lukku við nýggju maskinuni og góða eydnu við kavagrevstrinum.
Týskvøldið 26. november kl. 19.00 verður felags foreldrafundur í ungdómshúsinum.
Vit fáa vitjan av fólkaheilsuráðnum, sum kemur at hava ein sera áhugaverdan fyrilestur, ið varpar ljós á sálarliga heilsu, hvussu vit kunnu styrkja okkara sálarligu heilsu og sálarligu heilsuna hjá okkara ungu.
Umframt fyrilesturin bjóða vit sjálvandi kaffi, te og okkurt gott afturvið, og høvi verður eisini til prát og at síggja hvat gongur fyri seg í ungdómshúsinum annars.
Hetta kvøldið er bert ætlað foreldrum. Fólkaheilsuráðið kemur aftur at vitja okkum hóskvøldið 28. november, og tá koma tey at tosa við okkara ungu.
Tiltakið er ókeypis.
Blái Krossur og Fólkaheilsuráðið skipa fyri.
