Komandi vikuskifti fara Kristiliga Sangkórið og Kirkjukórið í Fríðrikskirkjuni at hava felags jólakonsertir. Kórini hava áður havt felags jólakonsertir.
Leygardagin kl. 17.00 verður konsert í Havnar kirkju.
Sunnudagin kl. 16.00 verður konsert í Fríðrikskirkjuni.
Øll eru hjartaliga vælkomin.
Seinastu fíggjarætlaninar hjá kommununum og samstørvum teirra, ið hava virkna í hesum valskeiðnum, eru avgreiddar. Tríggjar av kommununum við Skálafjørðin hava samstarvað um eldraøkið síðani 1. januar 2015 og gongur felagsskapurin undir heitinum Roðin. Samtakið eigur Røktar- og Ellisheimið í Runavík, Vesturskin á Toftum, Sjóvarlon á Strondum, Vistarheimið í Runavík og Dagtilhaldið fyri minnisveik á Skála.
Roðin er rímiliga væl fyri viðvíkjandi húsarúmd, kortini hava samstarvandi kommunurnar valt at gera út- og umbyggingar á Røktar- og Ellisheiminum í Runavík í 2020 og 2021. Fyri part snýr tað seg um út- og umbygging fyri at rationalisera í rakstrinum og fyri at taka svimjihylin á heiminum í nýtslu aftur. Tilsamans verður umbyggingin mett at kosta 13,7 milliónir krónur. Kommunurnar hava allar samtykt at fara undir átakið og ætla at taka íløguna sundur í tvey ár.
Væntiliga hava tey flestu fingið tað við, at afturberingarlykilin, ið varð krøktur í útleggingina av eldraøkinum, setir tær ymsu kommunurnar í landinum í ógviliga ymiskar støður fíggjarliga. Onkrar hava sertreytir, aðrar hava vinning og aftur aðrar hava dundrandi hall í mun til afturberingina frá landinum.
Landsstýrið/samgongan, sum sat frammanundan hesum, gjørdi onki við skeivleikan yvirhøvur, og hvørji átøk Kommunufelagið hevur gjørt fyri at fáa ta samgonguna á tal, vita vit ikki, annað enn tað, at lykilin er líka lítið hóskiligur í dag, sum hann var pr. 1. januar 2015 – fyri skjótt 5 árum síðani.
Kortini hendi tað undir samgonguni farnu, stutt fyri løgtingsvalið, at menn og kvinnur, sum kettur úr høvdatrogi, komu fram á torg og fóru at tosa um eina royndarskipan fyri Suðuroynna. Kommunufelagið var sjálvandi jaliga sinnað alt fyri eitt, men málið vann ikki landspolitiskan frama kortini. Nú hevur Javnaðarflokkurin lagt sama uppskot fram á ting av nýggjum, og í morgin kemur tað undir aðru viðgerð á Føroya løgtingi. Trivnaðarnevndin hevur býtt seg upp, og meiriluti hennara sigur í álitinum: ”Landsstýrismaðurin arbeiðir við málinum og tískil metir meirilutin, at tað er best at geva landsstýrismanninum frið at finna eina loysn á hesum máli.”
Hetta er ein skilagóð støða, um so er, at landsstýrið veruliga arbeiðir við at finna eina skilagóða loysn á eldraøkinum, sum javnsetir allar landsins kommunur á fíggjarliga mótinum. Í óðum verkum at fremja serskipanir, fyri eitt øki í landinum, ger bara málið uppaftur fløktari, serliga táið hetta snýr seg um part av landinum, sum saman við Sandoynni, stendur serliga væl í mun til afturberandi lykilin á eldraøkinum.
Fíggjarviðurskiftini hjá Roðanum eru dømi um, hvussu ómetaliga skeivt fíggjarviðurskiftini á eldraøkinum vóru handfarin frá byrjan, og síðani er onki gjørt fyri at rætta mistakið.
Rakstur:
Upphæddirnar niðanfyri eru tær, sum skattgjaldararnir í teimum trimum kommununum hava goldið, afturat tí sum goldið er og verður úr landskassanum til eldraøkið:
Runavíkar kommuna Nes kommuna Sjóvar kommuna
2015 4,100 mió. kr. 0,058 mió. kr. 0,935 mió. kr.
2016 6,200 mió. kr. 1,055 mió. kr. 0,909 mió. kr.
2017 7,200 mió. kr. 1,075 mió. kr. 1,105 mió. kr.
2018 8,000 mió. kr. 1,197 mió. kr. 1,399 mió. kr.
2019 8,700 mió. kr. 1,455 mió. kr. 0,969 mió. kr.
2020 11,700 mió. kr. (FÆ2020) 2,424 mió. kr. 2,053 mió. kr.
Total 45,900 mió. kr. 7,264 mió. kr. 7,370 mió. kr.
Harvið hava skattgjaldararnir við Skálafjørðin, táið hetta valskeiðið er runnið, eftir 6 árum, goldið smáar 61 milliónir krónur úr egnum kassa til tess at reka eldraøkið. Umframt brúkaragjøldini er hetta kostnaðurin – umframt fíggingina frá landinum.
Afturat hesum gjørdi Runavíkar kommuna íløgur fyri 28,7 mió. kr. í 2015, táið hon keypti ognarpart í Eysturoyar Røktar- og Ellisheimi, umframt at keypa seg til eina javnvág í mun til samstarvskommunurnar, sum burturúr hesum fingu ein ágóða á 5,7 mió. kr. Sjóvar kommuna brúkti kortini 4 mió. kr. meira til sambýlið Sjóvarlon enn væntað, harvið minkar upphæddin við 1,7 mió. kr. í heildarmyndini hesum viðvíkjandi. Hartil hava kommunurnar sum nevnt samtykt at út- og umbyggja fyri 13,7 mió. kr. í 2020 og 2021.
Tí kann staðfestast, at Runavíkar, Nes- og Sjóvar kommunur hava brúkt og fíggjarætlað seg til at brúka 101,234 milliónir krónur úr egnum kassum til eldraøkið frá 2015 fram til 2020/21.
Okkara er nú leikluturin at reka eldraøkið við mesta skili, skrivið skal nú heldur ikki skiljast sum harmaljóð, heldur sum eitt relevant ískoyti til orðaskiftið um eldraøkið, ið tykist vera farið heilt av kós í landspolitiska geiranum. Vónandi fer tað at eydnast sitandi samgongu/landsstýri at fáa málið á rættkjøl aftur.
Virðingarmest
Artur Johansen, borgarstjóri, Sjóvar kommuna
Jóhannus Danielsen, borgarstjóri, Nes kommuna
Tórbjørn Jacobsen, borgarstjóri, Runavíkar kommuna
Søkt verður eftir fólki, at gera reint í fimleikarhøllini í Tofta skúla at byrja fyrst í januar 2020.
Reingerðin er uml. 20 tímar um vikuna, sum verður at fremja um kvøldið, eftir at høllin er stongd, ella tíðliga á morgni, áðrenn skúlatíð.
Løn verður goldin sambært sáttmálanum hjá Føroya Arbeiðarafelag.
Skrivligar umsóknir verða at senda til Nes kommunu, Toftavegur 3, 650 Toftir ella við telduposti, nes@nes.fo, í seinasta lagið 28.12.2019.
Nærri upplýsningar fáast við at venda sær til umsjónarmannin í Tofta skúla, tlf. 565003.
Í síðstu viku byrjaði JHR arbeiðið við útstykkingini, sum Nes kommuna hevur samtykt at gera, undir Høganesi. Áðrenn arbeiðið byrjaði, hevur kommunan hegnað økið av.
Verkætlanin umfatar gerð av 350 m av asfalteraðum vegi við gongubreyt, íroknað klokk- og spillvatnsleiðingar og gøtuljós. Fram við vegnum er pláss fyri 11 grundstykkjum, sum øll eru seld.
Eftir ætlan skal arbeiðið verða liðugt í apríl 2020.
Í summar byrjaði arbeiðið við at grava út fyri nýggja frítíðarskúlanum á Brekkukletti. Tað arbeiði er liðugt og sjálv byggingin er byrjað. Tað er RTS Entreprenørar, sum hava gjørt økið byggibúgvið, og tað er KBH Entreprenørar, sum skulu byggja frítíðarskúlan.
Umframt frítíðarskúla fer nýggi bygningurin eisini at húsa elsta árganginum í barnagarðinum.
Bygningurin, sum verður bygdur norðurfrá verandi frítíðarskúla, er í 2 hæddum. 1 stova við bólkarúmi er á hvørjari hædd. Harumframt er innrættað inngongd/uppgongd, klædnarúm, felagsøki til verandi frítíðarskúla og nýggju stovurnar, starvsfólkarúm og skrivstova.
Ætlanin var, at arbeiðið skuldi verða liðugt til skúlaársbyrjan á sumri í 2020, men tað er broytt. Arbeiðið skal eftir ætlan nú verða liðugt um eitt ár.
Fyri góðari viku síðani bleiv sunnari íbúðarbygningurin reistur. Nú eru báðir bygningarnir reistir og tann norðari um at verða liðugt innilokaður. Vindeygu verða nú ísett norðara bygningin.
Arbeiðið við vegi og parkeringsøki, er um at verða liðugt. Asfalteringin manglar, og verður gjørd í næsta ár. Gøtuljósini eru uppsett og eru farin at lýsa.
Tað er Falkon Entreprenørar, sum hava gjørt gjørt grundøkini byggibúgvin og hava gjørt veg og parkeringsøkir fyri Nes kommunu.
Byggivirkið KBH byggir íbúðarbygningarnar fyri Bústaðir.
Bygningarnir hýsa íalt 18 íbúðum. Væntandi verður tann norðari bygningurin liðugur til jóla næsta ár og hin seinni á sumri 2021.
Aftur í ár fara næmingar hjá Nes Sóknar Musikkskúla at hava framførslur.
Skráin fyri Jólakonsertirnar í Nes og Runavíkar kommunu ??
10.desembur kl. 17:30 í Tofta skúla
10.desembur kl. 19:00 í Tofta skúla
11.desembur kl. 18:00 í skúlanum vid Løkin ?
11.desembur kl. 19:30 í Glyvra kirkju ?
12.desembur kl. 11:00 í Kelduni ?
12.desembur kl. 17:00 í Skála skúla
18.desembur kl. 17:00 í Vesturskin, Toftir.?
Verið hjartaliga vælkomin ?
Sunnukvøldið andaðist Hákun Jacobsen, skipari, 75 ára gamal. Í samband við móttøkuna av Jógvan I við Toftagjógv í gjár, var tøgn eina løtu, har Hákun bleiv mintur við tøkk og virðing.
Hákun Jacobsen var sonur Mathias Jacobsen, reiðara og handilsmann av Toftum og Annu Malenu, ættað úr Klaksvík. Hákun giftist við Elsu Danielsen, f. Jacobsen, ættað av Roykheyggi í Saltnesi.
Hákun fór til skips við Elsu í 1959 og sigldi í nøkur ár sum motormaður og bestimaður. Hákun tók skiparaprógv í 1964 og førdi í nógv ár línuskipið Jógvan Norði, sum brøðurnir Hákun og Jógvan Jacobsen áttu. Jógvan Norði sakk í 2003.
Brøðurnir keyptu nýtt skip og frá 2005 førdi Hákun tann nýggja Jógvan Norði, sum bleiv seldur í 2007 og fekk navnið Kambur.
Jarðarferðin hjá Hákun verður úr Fríðrikskirkjuni, fríggjadagin kl. 13.00.
Í samband við móttøkuna av nýggja frystilíniskipinum, sum kom á Toftir ígjár, kunngjørdi reiðarin, Anfinn Olsen, at nýggja skipið skuldi hava navn eftir pápa sínum, Jógvan I.
– Tað eru í ár 50 ár síðani, at Jákup, Petur og pápi komu við sínum skipi, og tá vóru vit stolt, segði Anfinn Olsen.
Anfinn segði í røðuni, at hann spurdi pápa sín, hvat navnið skuldi vera á nýggja skipinum.
– Eg var ikki nøgdur við tað heitið, ið pápi kom við. Hann nevndi, at tað kundi eita Vektin, sum er eitt stað á vestarakanti á Tangafirði, sum vit sóu frá vindeyganum hjá okkum. Men tað helt eg ikki vera gott nokk. Vit hava tí tikið ta støðu, at skipið skal fáa navn eftir pápa og skal eita Jógvan I, segði Anfinn Olsen.
Úr bygdsøguni kunnu vit lesa um Jógvan Ingvard Olsen, at hann er føddur á Toftum í 1930. Sum 15 ára gamal fór hann við deksfarinum Nípuni, sum pápi hansara var formaður á. Síðani var hann millum annað við Morgunstjørnini, Kongshavn, Elsu, trolaranum Vesturvarða og Oyraskeri.
Jógvan I. Olsen tók skiparaprógv í 1953 og longdina í 1954. Eftur tað var hann eitt skifti við norskum sildabátum og á kópaveiðu í Vesturísinum. Síðani var hann í nøkur ár við Elsu, og í 1957 var hann við til fiskiskap í Íslandi.
Jógvan I. Olsen førdi Mjóanes í 1958. Í 1959 og 1960 førdi hann Elsu, men í januar 1961 á veg til marknað í Aberdeen sigldu teir á land í Pentland Firth. Skipið gjørdist vrak, men fólkaskaði hendi eingin. Eftir tað fór hann at føra Brimnes og Svínoynna.
Við ársenda í 1961 fór Jógvan Ingvard at føra nýggja stállínuskipið Jógvan Norði hjá Mathias Jacobsen. Hann førdi skipið á ísfiskaveiðu og saltfiskaveiðu frá 1961 og 1967 og meginpartin av 1968.
Í 1968 var Jógvan I. Olsen við til at lata Stapan byggja í Vestmanna. Stapin skuldi avreiða til nýstovnaða flakavirkið Nyk. Jógvan Ingvard førdi Stapan tvey tey fyrstu árini. Frá 1970 sat hann í løgtinginum og eisini 2 skeið í bygdaráðnum. Hesi árini førdi hann Stapan einstakar túrar.
Í 1960 handaði Føroya Landsstýri Jógvan I. Olsen heiðursmerkið “Fyri hús og heim” fyri í 1960 at hava flutt stóra og væl hagreidda veiðu til lands sum skipari á Elsu.
Í 1983 stovnaðu teir, sum áttu Stapan, saman við øðrum partsreiðaríið Snoddið við heimstaði á Toftum. Teir lótu feskfiskahekkutrolara byggja í Noregi. Trolarin fekk navnið Snoddið og kom til Føroyar í 1984. Jógvan Ingvard var tveir túrar sum dekkari við Snoddinum og hevur ikki verið til fiskiskap eftir tað. Men hann var reiðari á bæði Stapanum og Snoddinum.
Jógvan Ingvard Olsen er kendur í Føroyum sum tingmaður fyri Sambandsflokkin frá 1970-1998, harav var hann tingformaður juli-sept. 1994 og 1995-1998. Han var landsstýrismaður í fiskivinnu- og orkumálum juni 1989 til januar 1990.
Í Nes kommunu sat hann sum bygdaráðslimur frá 1975 til 1980, harav bygdaráðsformaður frá 1977 til og við 1980.
Í gjár skipaðu Nes kommuna og P/F Eysturoy fyri móttøku á Toftagjógv, í samband við at P/F Eysturoy hevur keypt nýtt frystilíniskip, Atlantic, úr Noreg.
Tónleikur frá Nes Sóknar Hornorkestri tónaði, tá skipið kom inn í Tofta havn. Borgarstjórin í Nes kommunu, Jóhannus Danielsen, bjóðaði vælkomin og helt talu, áðrenn mennirnir úr Undirhúsinum á Toftum sungu 3 sangir.
Síðani talaði reiðarin Anfinn Olsen og í endanum á talini segði hann, at hann hevði avgjørt, at skipið skuldi kallaðast upp eftir pápa hansara, og skuldi hava navnið Jógvan I.
Eftir taluna hjá Anfinn bjóðaði Kristmund Johannsen øllum í teltið, sum var sett upp møttøkuna, til suppu og kaku, eins og øll vóru boðin umborð at hyggja at skipinum.
