Forfatter: Súni í Hjøllum

Bygdaráðið samtykti á fundi 26. apríl 2021 uppskot um at broyta almennu byggisamtyktina fyri Nes kommunu fyri part av matr. nr. 746a og 267e.

Uppskotið til broytingina snýr seg um at broyta part av matr. nr. 746a og 267e frá ”B, Bústaðarøki” til ”A2, Miðstaðarøki – íbúðir”. Eisini skal ein partur av matr. nr. 267a broytast frá ”H, avlopsøki – landbúnaður, grótbrot, fiskaalistøðir o.a.” til ”A2, Miðstaðarøki – íbúðir”. Broytingin er í sambandi við ætlanir um at byggja íbúðir, raðhús og líknandi í økinum.

Tilfar, sum lýsir uppskotið um at broyta almennu byggisamtyktina fyri part av matr. nr. 746a og 267e, liggur frammi á heimasíðuna hjá Nes kommunu og á kommunuskrivstovuni frá 4. juni 2021 til 16. juli 2021.

Møgulig mótmæli ella broytingaruppskot verða at senda Nes kommunu skrivliga til nes@nes.fo í seinasta lagi 16. juli 2021.

Sí pdf kort her Kunngerð – Broyting av byggisamtyktini á Høganesvegnum.

 

Bygdaráðið samtykti á fundi 26. apríl 2021 uppskot um at broyta almennu byggisamtyktina fyri Nes kommunu fyri matr. nr. 415o og 415p.

Uppskotið til broytingina snýr seg um at broyta part av matr. nr. 415o og 415p frá at vera ”A, Miðstaðarendamál” til at vera ”A2, Miðstaðarøki – íbúðir”.

Broytingin er í sambandi við ætlanir um at byggja íbúðir í økinum.

Tilfar, sum lýsir uppskotið um at broyta almennu byggisamtyktina fyri part av matr. nr. 415o og 415p, liggur frammi á heimasíðuna hjá Nes kommunu og í kommunuskrivstovuni frá 4. juni 2021 til 16. juli 2021.

Møgulig mótmæli ella broytingaruppskot verða at senda Nes kommunu skrivliga til nes@nes.fo í seinasta lagi 16. juli 2021.

Sí pdf kort her Kunngerð – Broyting av byggisamtykt fyri matr. nr. 415o og 415p

 

Bygdaráðið samtykti á fundi 26. apríl 2021 uppskot um at broyta almennu byggisamtyktina fyri Nes kommunu fyri part av matr. nr. 264h.

Uppskotið til broytingina snýr seg um at broyta part av matr. nr. 264h frá ”F, Almenn frítíðarøki”, part av ”B, bústaðarøki” og ein part av ”H, avlopsøki – landbúnaður, grótbrot, fiskaalistøðir o.a.” til ”A2, Miðstaðarøki – íbúðir”.

Broytingin er í sambandi við ætlanir um at byggja íbúðir, raðhús og líknandi í økinum.

Tilfar, sum lýsir uppskotið um at broyta almennu byggisamtyktina fyri part av matr. nr. 264h, liggur frammi á heimasíðuna hjá Nes kommunu og í kommunuskrivstovuni frá 4. juni 2021 til 16. juli 2021.

Møgulig mótmæli ella broytingaruppskot verða at senda Nes kommunu skrivliga til nes@nes.fo í seinasta lagi 16. juli 2021.

Sí pdf kort her Kunngerð um broyting av byggisamtykt á Regnavegnum

Sí leinkju her

Á bygdaráðsfundi 31. mai varð samtykt at seta Elsbet Ellingsgaard Magnussen, ið er búsitandi í Saltnesi, sum nýggjan kommunuskrivara í Nes kommunu.

Elsbet, sum er 28 ár, hevur ymiskar arbeiðsroyndir. Hon hevur seinastu árini verið í skrivstovulæru hjá Nes kommunu, hevur BA í politikki og umsting frá Fróðskaparsetur Føroya 2014-18 og ávegis at taka M.S.Sc.

10 umsóknir vóru til skrivarastarvið.

Í Tofta skúla eru lærarastørv og námsfrøðilig stuðulsstørv leys at søkja fyri skúlaárið 2021/22

Trý møguliga fýra tíðaravmarkað lærarastørv. Sí lýsing her

Harumframt eru eisini trý tíðaravmarkað námsfrøðilig stuðulsstørv leys. Sí lýsing her

Umsóknarfreistin er mikudagin 9.juni kl 12.

Hevur tú hug og hegni til at gera reint?

Til Barnagarðin á Svangaskarði verður søkt eftir einum fólki til reingerð, at byrja 16.08.2021.

Arbeiðstíðin er 20 tímar um vikuna, hvønn gerandisdag eftir kl. 16.00.

Arbeiði fevnir um dagligu reingeringina, í tí eina partinum av barnagarðinum.

Starvið verður sett sambært sáttmála millm Føroya Arbeiðsgevarafelag og Føroya Arbeiðarafelag

Meira fæst at vita um starvið við at venda sær til Tóru Johannessen leiðara á tlf 565021.

Skrivligar umsóknir við møguligum viðmælum skulu verða Nes kommunu í hendi í seinasta lagi mánadagin 14.06.2021.

 

Nes Kommuna

650 Toftir

www.nes.fo

nes@nes.fo

Á Nesi, Toftum og Saltnesi verða húsarhaldsposarnir vanliga heintaðir týsdag, men í komandi viku verða teir heintaðir hósdagin 27. mai í staðin.

 

 

Síðani desember mánað seinasta ár, hava kvinnur samlast regluliga, annaðhvørt hóskvøld, til hugnakvøld/bindiklubb í samkomuhølinum (kjallaranum) á Vesturskin.

Kvinnur eru komnar uppí so við og við, og nú ynskja fyrireikararnir at lýsa tiltakið her, so tað kemur út til allar kvinnur, sum hava hug at verða við.

Tiltakið er hóskvøld frá kl. 20-22 í ólíka vikum. Endamálið við tiltakinum er, at kvinnur, sum eru fluttar til Nes kommunu at búgva, og tí møguliga ikki hava eitt stórt sosialt netverk her ella ganga í nøkrum bindiklubba, skulu koma at kennast og hugna sær saman.

Tiltakið er ætlað bæði kvinnum, sum koma úr útlondum og kvinnum, sum hava búð aðrastaðni í Føroyum. Er onkur onnur kvinna, sum ynskir at verða við, so er hon eisini hjartaliga vælkomin.

Tað er Maja Højgaard Jakobsen, sum hevur tikið stig til tiltakið, og orsøkin er, at hon gjørdist varug við, tá vitjunartænastan hjá Reyða krossi byrjaði, at tað eisini vóru yngri kvinnur, sum kanska ikki hava eitt so stórt netverk í økinum her ella ganga í nøkrum bindiklubba. Tá ein flytur til aðra bygd/bý/land, so flyta vinkonurnar jú ikki við.

Tað eru Maja og Hansina hjá Olaf, sum skipa fyri kvøldunum, og Nes kommuna, sum gleðist um tiltakið, hevur skaffað hølið í Vesturskin til endamálið.

Maja og Hansina gleða seg at síggja nógvar kvinnur  hóskvøldið 27.mai kl. 20 – við ella uttan stokkar.

 

Á seinasta bygdaráðsfundi varð einmælt samtykt at stuðla barnablaðnum “Píka sjey við 100 kr fyri hvønn næming í grunddeildini (0-3. fl.).

 

Samtyktin ber í sær, at nú kunnu allir næmingar í grunddeildini fáa barnablaðið ”Píka sjey” ókeypis. Blaðið kemur út sjey ferðir um árið.

 

Bókadeild Føroya Lærarafelags stendur fyri útgávuni. Høvuðsendamálið er at geva børnum viðkomandi og spennandi tilfar á móðurmálinum, har teirra áhugamál úr egnum gerandisdegi verða umrødd.

 

“Píka sjey” er eitt sera spennandi blað, ið eisini hevur eina heimasíðu (pikasjey.fo), sum man kann vitja.

Ein lærari sigur soleiðis: ”Vit vaksnu kunnu halda, at tað, sum stendur í bløðunum, er bara fjas, men tað halda  børnini ikki, tað sæst týðiliga, tá blaðið kemur. Tey eru sum grippar eftir blaðum og vilja lesa alt fyri eitt. Sjálv haldi eg, at tað er deiligt, at okkara børn kunnu leita sær upplýsingar í lættlisnum teksti.”

Vónandi verður átakið børnunum og móðurmálinum til frama.

 

 

 

 

Nes-, Sjóvar- og Runavíkar kommuna umsita í felag barnaverndina í økinum við Skálafjørðin. Nú húsast barnaverndin í húsunum, sum Símun í Bakkanum og konan Karla í sínari tíð bygdu úti við Toftavatn. Roðin, sum er eldrasamtakið hjá somu kommunum, eigur húsini.

 

Ingrid Jensen, sum hevur verið leiðari í barnaverndini í nøkur ár, hevur valt at taka við øðrum avbjóðingum. Tí varð neyðugt at søkja eftir nýggjum leiðara. Setanarnevndin, ið er mannað av borgarstjórunum, innstillaði einmælt Jenny Petersen. Hesum tóku bý- og bygdaráðini einmælt undir við. Jenny Petersen varð sett sum leiðari frá 1. mai 2021.

Jenny Petersen er 46 ár, útbúgvin sosialráðgevi og hevur seinastu 15 árini starvast í Barnaverndini við Skálafjørðin. Fyrstu árini eftir lokna útbúgving starvaðist hon sum sosialráðgevi í Danmark. Komin aftur til Føroya, var hon í starvi á Almannastovuni. Jenny hevur verið á fleiri fakligum skeiðum og luttikið á viðkomandi ráðstevnum. Fjølbroyttu royndir hennara eins og skipað samstarv við stovnar og myndugleikar er sera týðandi fyri starvið.

Í samband við vaktarskiftið varð skipað fyri hugnaligari samkomu seinast í apríl.  Her nýttu fleiri høvi at takka Ingrid Jensen og ynskja nýggja leiðaranum hepna hond við starvinum.

Vegna kommunurnar í samstarvinum takkaði Tórbjørn Jacobsen, borgarstjóri í Runavíkar kommunu, Ingrid Jensen fyri trygga leiðslu og gott samstarv. Samstundis ynskti hann vegna kommunurnar Jenny Petersen blíðan byr í nýggja og ábyrgdarfulla starvinum.

Av tí at skrivarin hevur sagt seg úr starvi frá 1. juli, søkir Nes kommuna eftir nýggjum kommunuskrivara.

Talan er um eitt fjølbroytt og spennandi starv, har viðkomandi í settur verður kemur at arbeiða í tøttum samstarvi við umsiting, bygdaráð og borgarstjóra.

Starvslýsingin kann lesast her.