verður í dag, fríggjadagin 10. juni kl. 16-18
Kl. 16 fara formaðurin í Trivnaðarnevndini, umboð fyri FuglaArk, borgarstjórin og leiðarin í Frítiðarskúlanum at siga nøkur orð.
Tónleikabólkur framførir, og kommunan bjóðar okkurt gott undir góman.
Aftaná er høvi at síggja nýggja bygningin eins og tann gamla partin, sum er dagførdur.
Hjartaliga vælkomin!
Nes kommuna.
fríggjadagin 10. juni kl. 16-18
Kl. 16 fara formaðurin í Trivnaðarnevndini, umboð fyri FuglArk, borgarstjórin og leiðarin í Frítiðarskúlanum at siga nøkur orð.
Sangbólkur framførir, og kommunan bjóðar okkurt gott undir góman.
Aftaná verður høvi at síggja nýggja bygningin – eins og tann gamla partin, sum er dagførdur.
Hjartaliga vælkomin!
Nes kommuna.
Arbeiðið uppá at gera vegin til níggju grundøki á Ólavsvegi var liðugt í vár, og í dag varð avhendingarskjalið undirskrivað av Rúna Petersen frá JHR og Súna í Hjøllum, borgarstjóra.
Nes kommuna avgjørdi í fjørvár at taka av lægsta tilboðnum, sum var frá JHR v/Høgna og Rúna Petersen. Tilboðið var á 1,9 mió. kr. Nes kommuna hevur sjálv staðið fyri at leggja ávísar leiðingar. Nú arbeiðið varð avhendað í dag, var samstundis staðfest, at arbeiðið hevur gingið væl og at tilboðskostnaðurin hevur hildið.
Teknistovan í Gøtu v/Henning Olsen og Jens Kl. Jacobsen hevur havt teknisku vegleiðingina og eftirlitið við arbeiðnum fyri Nes kommunu.
Vegna Nes kommunu takkaði borgarstjórin JHR og Teknistovuni fyri vælaverk og gott samstarv. Hann fegnaðist annars um góða útsýni á Ólavsvegi og ivast ikki í, at áhugi fer at vera fyri grundøkjunum, sum koma á sølulistan hósdagin 2. juni, tá ið Nes kommuna fer at royna nýggja leistin fyri sølu av grundøkjum.
Sí. tøk grundøki á heimasíðuni nes.fo
Nes kommuna hevur søkt eftir nýggjum leiðara til Tofta Kvøldskúla, nú Áki Dyssegaard, sum hevur verið leiðari, hevur sagt seg úr starvi. Inn komu tríggjar umsóknir.
Á bygdaráðsfundi tann 2. mai 2022 varð avgjørt at seta Johnleif Gerðisá, Nes, í starvið.
Jónleif Gerðisá er námsfrøðingur, umframt at hann hevur lokið svimjilæraraprógv, venjaraútbúgving, dómaraprógv hjá DBU, hægri handilsútbúgving á Kambsdali og útbúgving í telduflokki á Kambsdali. Harumframt hevur Jónleif drúgvar starvsroyndir innan barna- og ungdómsarbeið. Hann hevur verið bæði leiðari í ungdómshúsi, venjari og samskipari innan ítrótt.
Johnleif Gerðisá tekur við starvinum tann 1. august 2022
Fyrr í vikuni varð Jákup á Borg settur sum nýggjur venjari í B68. Beint eftir venjingina fyrrapartin vitjaði borgarstjórin á Svangaskarði, har skipað varð fyri einum kaffifundi saman við leiðsluni í B68.
Súni í Hjøllum, borgarstjóri, bjóðaði, vegna Nes kommunu, nýggja venjaranum hjartaliga vælkomnum og ynskti honum og felagnum blíðan byr at byggja víðari á tað, sum Øssur Hansen og onnur góð fólk í felagnum hava framt seinastu árini.
Borgarstjórin segði, at Svangaskarð og B68 er ein stórur partur av samleikanum hjá bygdafólkinum. Vit standa saman um Ítróttarfelagið og fara av fullum huga at stuðla flaggskipinum í B68, nú fyrsti dysturin við nýggja venjaranum verður í morgin, sunnudagin, ímóti EB/Streymi á heimavølli.
Jákup á Borg takkaði hjartaliga fyri móttøkuna, sum hann hevði fingið á Svangaskarði, frá leiðsluni í felagnum, leikarunum, hjálparfólkunum o. ø. á Toftum.
Venjarin hevur góðar vónir. Hann bæði vónar og væntar, at nógv viðhaldsfólk møta til dystin í morgin og legði dent á, at tað hevur ovurstóran týdning fyri liðið, at viðhaldsfólkini møta upp og stuðla liðnum sunnudagin.
Á bygdaráðsfundi tann 2. mai samtykti bygdaráðið at taka av tilboði frá Byggivirkinum KBH um at umbyggja í 1981-bygninginum í Tofta skúla soleiðis, at Musikkskúlin fær eina nýggja tónleikastovu – ella fýra nýggj venjingarrúm, sum eisini kunnu brúkast í einum til felags venjingar. Í samband við umbyggingina verða eisini aðrar tillagingar gjørdar, eitt nú við nýggjari brandtrappu.
Fyrrapartin varð sáttmáli undirskrivaður. Vegna Nes kommunu undirskrivaði Súni í Hjøllum, borgarstjóri. Vegna KBH undirskrivaði Helgi Johannesen, stjóri.
Teknistovan í Gøtu hevur teknisku umsitingina av málinum, meðan Steingrund Akustik hevur ráðgivið um ljóðviðurskiftini.
Nes Sóknar Musikkskúli er ein musikkskúli, sum Runavíkar Kommuna og Nes Kommuna eru saman um.
Leiðarin í Nes Sóknar Musikkskúla er Tóri Restorff Jacobsen.
Fíggjarliga verður musikkskúlin skipaður á tann hátt, at land og kommunur gjalda hvør sína helvt av kostnaðinum. Í okkara føri eru tvær kommunur um musikkskúlan, og tær bera hvør sín part av kommunalu útreiðslunum – eftir nærri avtalum og ásetingum.
Tofta skúli skipaði týsdagin 3.mai fyri einum sera væleydnaðum stuðulsátaki til frama fyri ”Hjálp til Ukraina”.
Stuðulsátakið varð skipað sum ein stuðulsrenning uppi á rennibreytini á Svangaskarði, hvar ið allir næmingarnir runna ella gingu í ein hálvan tíma.
Fleiri møguleikar vóru at stuðla átakinum. Rættiliga nógv valdu at lata pening, fyri at stuðla næmingunum, sum gingu ella runnu. Onnur komu við reiðum peningi.
Næmingaráðið í Tofta skúla skipaði eisini fyri fløskuinnsavnan og rættilgia nógur peningur kom eisini inn ígjøgnum teirra átak.
Eftir stuðulsrenningina á Svangaskarði, fóru øll oman í Tofta skúla, har allir næmingarnir og skúlabólkurin fingu sunkist og søtmeti, sum Nes kommuna hevði latið til høvið.
Stuðulsátakið endaði við einari almennari hugnaløtu kl.13.00. Á skránni varð nógvur sangur, har næmingar spældu undir á ljóðføri og sungu fyri til felagssangin. Nógv foreldur, ommur, abbar og aðrir næstringar møttu upp til hesa hugnaløtu. Tá sangløtan var liðug, varð boðið til ein góðan kaffimunn. Eisini varð møguligt at keypa smákøkur og heimagjørt súltutoy.
Eftir áheitan frá Nes kommunu var 8. flokkur og ruddaði á Svangaskarði ein dag herfyri. Samsýningin fyri hetta arbeiðið fór eisini óskerd til stuðulstiltakið.
Nú er endaliga gjørt upp, hvussu nógv kom inn til stuðulsátakið ”Hjálp til Ukraina”. Inn komu 63.024,50 kr.
Beint eftir morgunsanin í Tofta skúla í morgun, varð kekkurin handaður til Reyða Kross. Tað var Jónas Thomsen, formaður í næmingaráðnum, sum gjørdi hetta vegna Tofta skúla.
Kristianna W. Poulsen, sum umboðaði Reyða Kross í morgun, takkaði hjartaliga fyri og minti á, hvussu stóran týdning tað hevur, at vit øll standa saman og vilja hjálpa í neyðstøðu.
Í vár samtykti bygdaráðið, eftir tilmæli frá Burðardygd, at rudda í sjónum fram við havnalgnum. Hetta skuldi gerast í samband við árliga ruddingardagin hjá Nes kommunu, sum var 30. apríl. Av ávísum orsøkum varð átakið útsett, men varð so gjørt í síðstu viku.
Ein kavarafyritøka stóð fyri ruddingini. Arbeiðið fevndi um alt leyst tilfar út á 10 metrar frá bryggjuni. Á teir lutir, sum ikki kundu takast upp við hond, vórðu endar settir á, so teir kundu verða lyftir upp við krana. Arbeiðsmenninir hjá kommununi hjálptu til við hesum.
Sigast má, at rættiliga stórar nøgdir av óruddi komu úr sjónum. Við hesum átaki vil kommunan varpa ljós á, hvussu umráðandi tað er, at vit øll standa saman og dagliga hugsa um okkara umhvørvi – bæði á sjógvi og landi.
