Seinnapartin varð skipað fyri hugnaløtu í Undirhúsinum á Toftum, nú avtalan við Nes kommunu varð undirskrivað.
Súni í Hjøllum, borgarstjóri, undirskrivaði fyri Nes kommunu, meðan Haldor Gaardbo, formaður, undirskrivaði fyri Undirhúsið.
Á býráðsfundinum 30. mai í ár samtykti býráðið í Nes kommunu at gera avtalu við Undirhúsið á Toftum.
Avtalan ber í sær, at Nes kommuna fær rætt til at leiga eitt høli í kjallaranum í Mathiasa Pakkhúsi, har kommunan fer at innrætta eitt alment wc-høli.
Avtalan kemur í gildi tann 1. januar 2024 og er galdandi í 20 ár.
Eftir summarfrítíðina fer býraðið at taka støðu til, hvør fær arbeiðið at innrætta hølið.
Annars gongur arbeiðið við at umvæla Mathiasa Pakkhús til nýtt Undirhús eftir ætlan. Til hugnaløtuna í dag takkaði Haldor Gaardbo, formaður í Undirhúsinum, øllum, sum á einhvønn hátt higartil høvdu víst vælvild at stuðla byggingini av nýggja Undirhúsinum.
